Euskara estandarrean, datibo kasua pluraleko formei gaineratzen zaienean, -ei forma agertzen da (Hualde eta Ortiz de Urbina 2003: 181).

Hizkera anitzetan, ordea, datibo plurala -eri formarekin egiten da.

Horrez gain, badago datibo plurala egiteko hirugarren modu bat: ekialdeko -er (Zuazo 2014: 250).

Hasteko, -er datibo pluraleko forma Iparraldeko hizkera ugaritan lekukotzen da. Ekialdeko hizkerekin hasiz, -er aldaera ekialderen dauden eskualdetan entzun dezakegu, Zuazok (2014: 136) dioenez, Zuberoatik Hazparnera (Lapurdi) bitartean erabiltzen da, nahiz eta Hazparnen eta Larresoron (Camino 2004: 467) -eri ere erraten duten. Zuberoatik hegoalderago -er aurkitzen dugu, adibidez, Behe-Nafarroa osoan (Camino 2004: 467). Caminok (2020: 112) Ortzaizeko 1985eko lekukotasun bat biltzen du:

Hala ere, aipatu beharra dago Behe-Nafarroako mendebaldean -eri aldera ere lekukotzen dela, Baigorrin, Irrisarrin etab. (Camino 2004: 467). Lapurdirekin jarraituz, -eri erabiltzeaz gain, datibo plurala egiteko -er morfema lekukotzen da, Hazparnen, Larresoron eta Uztaritzen, erraterako (Epelde 2004b: 85). Dena den, Arrangoitzen, Senperen eta Ainhoan -ei ere lekukotzen da (Epelde 2004a: 666, 2004b: 283). Ekialderago, ordea, Itsasutik aitzin -er da aldaera nagusia (Epelde 2004a: 666).

Hegoaldean, -er/eri/ei formez gain bertze aldaera batzuk entzuten dira, izan ere, nafarrerak hainbat azpi-euskalki ditu. Erraterako, Sakana eskualdean hitz egiten den hego-sartaldeko (Zuazo 2014: 112) hiztunek datibo pluralean -airi/-eiri darabilte (Zuazo 2010: 78):

Nafarroako eta Gipuzkoako mugan ere, Bortzirietan, Irunen eta Hondarribian, datibo plurala egiteko bertze bi forma erabiltzen dira, -aki eta -akeri (Sagarzazu 2005: 69; Zuazo 2014: 101). Kontuan hartu behar dugu -(a)k- morfema hori postposizio batzuekin ere erabiltzen dela (Zuazo 2014: 101), beraz, erran dezakegu hizkera hauetan ere -(ak)eri forma dagoela. Nafarroarekin bukatuz, Iruñerri inguruko Txulapain, Oltza, Arakil eta Ezkabarte herrietan -ai da datibo pluraleko morfema (Camino 1999: 72).

Erdialdeko euskalkira begiratuz, Beasainen, adibidez, plurala nagusiki -ai eta -eirekin egiten da (Agirrebeña, Alberdi, Mendiguren eta Sarasua 2007: 40). Zaldibia inguruan ere -ai plurala aurkitzen dugu, baina kasu hauetan, singularra eta plurala bereizteko azentua erabiltzen da: neskái singularra eta néskai plurala (Etxabe eta Garmendia 2003: 62). Honekin batera, Gipuzkoan ere baina mendebaleko euskararen barnean, Deba Ibarreko herri batzuetan -eri da datibo pluralaren forma, adibidez, Elgoibarren (Makazaga 2009: 79) eta Eibarren (Sarasua, Agirrebeña and Zenarruzabeitia 2005: 128).

Mendebaleko euskalkiarekin jarraitzen badugu, -eri Bizkaian ere topa dezakegu, erraterako, Basaurin (Arretxe 1994: 88) edo Gernikan (Hualde eta Ortiz de Urbina 2003: 181). Gernikakoa da Hualdek eta Ortiz de Urbinak (2003: 181) ematen duten lekukotasun hau:

Horrez gain, nabarmentzekoa da Lekeition datibo plurala singularra bezala egiten dela: -ari (Arregi eta Nevins 2012: 27). Hain zuzen, singularra eta plurala desberdintzeko azentua erabiltzen dute bertako hiztunek: gixonari singularra eta gixonári plurala (Hualde, Elordieta eta Elordieta 1994: 88).

Datu-baseari dagokionez, askotariko emaitzak lortu ditugu laguneri eman diet erantzunarekin. Mendebaleko elkarrizketatuek, hain zuzen, Arteakoek, Elgoibarkoek, Gernikakoek eta Loiukoek erraterako, bai erabiltzen dute aldaera hau, orain arte aipatutakoarekin bat eginez. Dena den, badira mendebaleko hiztun batzuk -ei erabiltzen dutenak: Aramaion, Bergaran eta Otxandion. Bertzalde, erdialdean, elkarrizketatu bakar batek ere ez du -eri morfema erabiltzen datibo plurala egiteko. Adibidez, Beizaman, Hernanin eta Itsasondon.

Nafarroarekin jarraituz, mendebaleko euskalkiaren antzeko egoera lortu dugu, batzuek -eri darabilten arren (Goizuetan eta Urdiainen), Baztan inguruan, Arbizun eta Erroibar eskualdean ez. Aldaera honekin bukatzeko, nafar-lapurteraz aritzen diren inkestatu guztiek -eri erabiltzen dute: Oragarren eta Ziburun. Bertze formari dagokionez, orain arte aipatutakoa kontuan hartuz, laguner eman diet soilik Zuberoan lekukotzen da, Urdiñarben, hain zuzen ere.