Ikertzaileak

Beatriz Fernández

Ikertzaile nagusia

ORCID: 0000-0002-7632-7777

EHUko Hizkuntzalaritza eta Euskal Ikasketak Saileko Irakasle Osoa naiz. Euskal Filolologian doktoratu nintzen 1997an Euskal Herriko Unibertsitatean (EHU). ANECAk aitortutako ikerketako 4 seiurteko ditut eta Unibasqek aitortutako B1, B2, B3 eta A1 osagarriak ere bai. Irakaskuntzako 6 bosturteko ditut. Nire ikerketa ibilbidearen hasieratik, munduko hizkuntzen, oro har, eta zehazki, euskararen aldakortasun morfosintaktikoarekin lotuta egon da nire lana. Gaur egun argumentu egitura, boz eta predikatu konplexuetan nabil lanean. 2010etik Gogo Elebiduna / La Mente Bilingüe, Euskal Unibertsitate Sistemako Bikaintasunezko A labeleko Talde Egonkortuko kidea naiz (Ikertzaile Nagusiak: Itziar Laka eta Mikel Santesteban). Ikerketa lana zientzia-dibulgazioarekin uztartzen dut. Ikerketa zientifikoaren alorrean, Ikerketa, Garapen eta Berrikuntza Batzordeko (IGBBko) kidea izan naiz Arte eta Giza Zientzien 5. alorretik eta gaur egun Ikerketarako Laguntzarako Zuzendaria naiz UPV/EHUko Ikerketa Errektoreordetzan. Euskaltzaindiko Euskaltzain Urgazlea naiz.

Ane Berro

Ikertzaile nagusia

ORCID: 0000-0002-6818-506X

Deustuko Unibertsitateko irakaslea eta ikertzailea naiz Gizarte eta Giza Zientzien Fakultatean. 2015ean tesia defendatu nuen Euskal Herriko Unibertsitatean (EHU) (Doktorego sari berezia, 2017) eta Bordeaux Montaigne Unibertsitatean (UBM). Ondoren post-doc ikertzailea izan nintzen EHUn eta Structures Formelles du Langage laborategian (UMR 7023, CNRS & Paris 8).

Azken urteetan aditzen (eta beste kategoria batzuen) argumentu egitura, Boz alternantziak eta horiek kasuarekin eta komunztadurarekin duten zerikusia arakatzen ibili naiz. Momentu honetan, argumentu egitura eta morfologia aztergai dituen proiektu baten ikertzaile nagusia naiz Beatriz Fernándezekin batera. Horrez gain, Deustuko Unibertsitateko Language Acquisition and Processing laborategiko (LAPlab) eta Gogo Elebiduneko beste kide batzuekin batera, rol tematikoen prozesamendua aztertzen nabil.

Cecilia Fernández-Altonaga

Doktore-aurreko ikertzailea

ORCID: 0000-0001-9273-9598

Doktoreaurreko ikerlaria naiz Gogo Elebiduna ikerketa taldean (UPV/EHU) eta Baionako IKER-UMR5478 laborategian, EHUren eta Paue eta Aturrialdeko Unibertsitatearen arteko kotutela bati esker. Euskal Ikasketetan graduatua naiz EHUn (2017-2021) eta Hizkuntzalaritza Teoriko eta Esperimentaleko masterra egin nuen unibertsitate berean (2022). 2022tik aurrera tesia idazten ari naiz Beatriz Fernándezen (UPV/EHU) eta Urtzi Etxeberriaren (CNRS-IKER) zuzendaritzapean, eta horretarako, Espaniako Unibertsitateen ministerioaren doktore-aurreko FPU beka jaso dut [FPU21/05860].

Nire tesiaren helburua da euskarazko hainbat modifikatzailerentzako analisi morfosintaktiko eta semantikoak aurkitzea, berezki, tradizioan adberbio gisa deskribatu direnentzat (hala nola, –ki, –ka, –rik eta –ta atzizkiekin osatutakoentzat). Honen bidez, predikazioaren eta modifikazioaren arteko muga lausoak arakatzeko asmoa ere badut.

Kristina Bilbao

Doktore-aurreko ikertzailea

ORCID: 0000-0002-3832-6722

Doktore-aurreko ikertzailea naiz Euskal Herriko Unibertsitatean (EHU), Basque and Beyond eta Gogo Elebiduna ikerketa taldeetan. Euskal Ikasketetan graduatua naiz (2018-2022) EHUn eta Hizkuntzalaritza Teoriko eta Esperimentala masterra ikasi nuen unibertsitate berean (2022-2023). 2023tik doktore tesia egiten nabil Beatriz Fernándezen (EHU), Ane Berroren (Deustuko Unibertsitatea) eta Irene de la Cruz-Pavíaren (Deustuko Unibertsitatea) zuzendaritzapean. Horretarako, Espainiako Zientzia, Berrikuntza eta Unibertsitateen Ministerioaren doktore-aurreko FPU diru-laguntza jaso dut [FPU22/01851].

Hizkuntza aldakortasuna da nire interes akademiko nagusietako bat, batez ere morfosintaxiaren eta hizkuntza tipologiaren ikuspuntutik. Doktore tesian euskarazko egitura bihurkari eta elkarkari iragangaitzak ikertzen ditut. Tesiak egitura horien morfosintaxia aztertzea du helburu, boz alternantzia erakusten duten beste egitura batzuekiko harremanak ere arakatuz, hala nola egitura inkoatiboak edo inpertsonalak.

Jon Etxebarria

Doktore-aurreko ikertzailea

ORCID: 0009-0006-4124-4011

Euskal Ikasketetan graduatua naiz (2020-2024) Euskal Herriko Unibertsitatean. 2023-2024 ikasturtean Ikasiker Lankidetza beka [IkasC_2023_1_0067] izan nuen eta horrek Gogo Elebiduna ikerketa taldearekin kolaboratzeko aukera eman zidan Beatriz Fernandez (EHU) irakaslearen gidaritzapean.  Ondoren, 2024-2025 ikasturtean, Euskal Hizkuntzalaritza eta Filologia Masterra egin nuen unibertsitate berean. 2025eko irailaz geroztik doktore tesian lanean nabil Beatriz Fernández (EHU), Ane Odria (EHU) eta Irene de la Cruz-Pavíaren (Deustuko Unibertsitatea) zuzendaritzapean.

Aldakortasun linguistikoa nire ikerketa interes handienetako bat da eta doktore tesian mendebaldeko euskalkiko egitura arazleak aztertzen ditut. Horiei dagokienez, zehazki, menpeko aditz inakusatiboko egitura arazleetan araziaren markapenaren eta biziduntasunaren arteko harremana ikertzen dut.

Garazi Domínguez Mezquita

Doktore-aurreko ikertzailea

ORCID: 0009-0001-6660-0418

Euskal Hizkuntza eta Kultura eta Hizkuntza Modernoetan graduatua naiz (Deustuko Unibertsitatea, 2020-2025). Euskarako Gradu Amaierako Lanean, euskararen jabekuntza ikertzen hasi nintzen Ane Berro eta Irene de la Cruz-Pavíarekin batera; Mintzola Saria jaso nuen (2024) eta lana Euskara aldizkarian argitaratu genuen (2026). 2025-2026 ikasturtean, Hizkuntzalaritza Teoriko eta Esperimentaleko Masterra egin dut eta bertan euskararen jabekuntzaren ikerlerroan jarraitu dut. Hizkuntzalaritzako formakuntzaz gain, 2026ko ekainetik Irakaskuntzako Masterra (UNIR) egiten ari naiz.

Doktore tesia Irene de la Cruz Pavíak (DU) zuzentzen duen Language Acquisition and Processing (LAPlab) laborategian egin nahi dut. Nire asmoa da ume euskaldun elebakarren eta elebidunen jabekuntza eta prozesamendu morfosintaktikoa aztertzea.